الخميس، 15 ديسمبر، 2011

حملة إشترى المصرى



أول حاجة عايز أقولها إن الصورة دى أكتر صورة عجبتنى من كل تصميمات الحملة دى ( حملة إشترى المصرى ) ، مش عارف ليه ، بس حسيت إنها أكثر الصور بساطة و أسهلها فى التصميم و ما فيهاش لعب فوتوشوب كتر غير الكتابة و حتة الليمون اللى فى نص العلم قال يعنى هو ده النسر يعنى .

أهم حاجة فى الصورة دى إنها الصورة الوحيدة المعبرة بجد ، تحس انها بتتكلم ، تحس ان الصورة بتقولك هم دول اللى هتعرف تشتريهم و تكون متأكد انهم مصرى مية فى المية ، و فعلا مفيش حاجة ممكن تشتريها فى مصر صناعة مصرية غير الأكل و الشرب و غير كده إرمى فى الزبالة و إوعى تشتريه عشان هتتسك على أفاك .

قريت إمبارح واحد بيقولك يالا يا شباب اليابانيين مش أحسن مننا بعد ما تم ضرب اليابان بالقنبلة النووية قرروا ان هما مايستوردوش أى حاجة من خارج اليابان و اقتصرو فقط على المنتجات و الصناعات اليابانية وده كان سبب نهضة اليابان .
و أنا من هذا المزنق أحب أقوله إن حال مصر و نهضتها برضه هيتصلح بقنبلة نووية ... ماهو اليابانيين مش أحسن مننا .

و بعدين منتج مصرى إيه اللى إنت جاى تقول عليه .... يا جدعان أنا بشترى التيشرت ب 120 جنيه مبيكملش معايا هما غسلتين و يترمى و بشاير الدمار الشامل بتبان عليه من أول غسلة ... تلاقى التيشرت بدأ يفقد ملامحه الوسيمة و طلته البهية المكسمة و بقى شبه البنت بعد سنتين جواز .

مع إنى بشترى التيشرت عندى هنا فى السعودية بربع تمنه فى مصر انتاج هندى او تركى او صينى على النعمة يشارك المجنون فى عمره ، و الله بأرميه أو أديه لأى حد غلبان بعد ما زهقت من لبسه و هو زى ما يكون جديد مبيحصلوش حاجة ... و تيجى تقولى إشترى المصرى!!
رد عليا واحد بيقولى بصرف النظر عن الجودة  ... قولتله و بصرف الفلوس فى الصرف الصحى
 كلام ايه ده يا عالم ؟ يعنى واحد يبيعلى حاجة بايظه و أشكره و أشجعه عشان هو مصرى !! بالعكس أديله بالجزمة عشان يتعدل و ما ينصبش على الناس بمنتجات خربانة و سيئة و رديئة ، كده هو يتعلم و يحسن من صناعته و جودة منتجاته ... مش كده ولا إيه يا جدعان .... أنا قولت اللى اللى عندى ... روحوا إشتروا المصرى .بسرعة قبل ما يخلص يا جدعان .

ليست هناك تعليقات: