الأربعاء، 23 يوليو، 2008

الباشا بتاع البتاع


الباشا بتاع البتاع اللى بيقولوا عليه البتاع ده اسمه ايه ؟
آه افتكرت ... مجلس الشعب ...طلع علينا الراجل اللى فى الصورة اللى فوق دى وقال الكلام اللى جاى تحت ده بالنص (( مصر ليست فى حاجة لسن قوانين جديدة لفصل الدين عن السياسة بقدر حاجتها لقوة تنفيذ هذه القوانين ))
ده اعتراف ضمنى من حضرة جناب سعادته بأن مصر دولة علمانية سياستها الأصلية تقوم على عزل الدين عن الدولة أكتر ما هو معزول ومركون على جنب . أحب أبشرك انه آخرتكم سوده ان شاء الله.
ومع ان الشخص ده ما جابش جديد فى كلامه الا ان اعلانه كده على الملأ حرق دمى واستفزنى فقلت أدونه عشان كل ما أقراه أكره الراجل ده أكتر ما أنا كارهه.بس بصراحة الراجل ما كدبش ماهو مفيش مسؤول فيكى يابلد من الكبييييييير لحد الصغير عنده ذرة مراعاة لتعليمات دينه وشريعة ربنا فى ممارسة عمله و تأدية واجباته و الا ما كنش ده بقى حالنا.
نهايته... ربنا يستر على اللى جاى وربنا يعوض علينا بدستور جديد بدل دستور (مصر دولة اسلامية ديانتها الرئيسية الاسلام)اللى بوظتوه وقلبتوا كيانه ومسحتوا بيه البلاط.

الجمعة، 18 يوليو، 2008

فيديو عاجبنى جدا

شعبنا شعب طيب و دمه خفيف ويعشق الضحك حتى على همومه... شوفو الفيديو ده

video

الاثنين، 14 يوليو، 2008

حسنى مبارك 2500..صورة من المستقبل

رسالة لكل الكدابين اللى قالوا والعياذ بالله ان الريس تعبان وعيان وبيموت

انتو وحشين خالص و ربنا هيعذبكم فى النار و يحرقكم فيها لأنكو كدبتوا

وطلعتوا اشاعات وحشة على الريس

أنا عارف ان انتوا عايزين تخربوها وتقعدوا على تلها ....يا ظلمة

واللى مجننى انتو جيبتوا الكلام الوحش ده منين ؟

أكيد على المصطبة ساعة العصارى وطبعا الكلام يحلى وكل واحد يحكيله

حدوتة يسلى بيها القاعدة قبل ما يخش يقيله حبة

بس مش مهم أهو ربنا خلصه منكم وانكشفتوا واتسجنتوا ..أحسن ..

عشان تحرموا تعملوا كدة تانى ..يا وحشين !!

و على فكرة انتوا مش كدابين وبس ..ده انتوا كمان مش مؤدبين خالص

انتوا ماعندكوش باباهات ولا ايه؟

حد يقدر يقول على باباه كده؟؟؟؟؟

عارف انكوا هتدافعوا عن نفسكوا وتقولولى مكناش نعرف..جتكوا ستين خيبة

بقى فيه حد فى الدنيا كلها ميعرفش؟؟

ده العيل الصغير بينزل من بطن أمه وهو عارف ان الريس ما بيتعبش وما بيعياش

وما بيموتش كمان... انتوا أكيد بتستعبطوا وسايقين الهبل على الشيطنة.

ده انتو خبثاء جدا لدرجة ان انتوا شككتونى فى معلوماتى ..و اضطريت

أسرق آلة الزمن بتاعت بابا اللى شايلها فى البدروم بقاله سنين و مانعنا اننا

نقربلها عشان خايف علينا من المستقبل أحسن نروح ونتصدم ولا نتعقد ولا حاجة.

بس أنا جازفت و ركبتها ورحت طالع بيها على سنة 2030 لاقيت الريس زى ماهو

ماتغيرش خالص,, قلت أروح بعيد شوية, سنة2050 ..برضه هو هو

سنة 2100 ................نفس الحكاية

سنة2200.............موجود وزى الفل

سنة 2300..................تمام يا ريس

لحد ما وصلت سنة 2500وببص على البنزين لاقيته قرب يخلص قلت لازم أروح أحسن تبقى حوسة

بس أتأكد الأول الريس موجود ولا لأ.. لمحت راجل كبير قاعد على الرصيف جنب محطة مصر بيبيع

( لاب توب ) .. ناديت عليه .. ياعم يا بتاع الاب توب .. قاللى أيوه يابنى أى خدمة؟؟؟

قلت له عايز أسأل بس .. هو الريس حسنى لسه عايش ولا....

قاللى بس ماتكملش وتف من بقك و بطلوا اشاعات بقى الراجل عايش وصحته عال العال

وكان لازم أجيب معايا اثبات طبعا عشان ما حدش يكدبنى و أعمل زى اخواننا دول و أروح

فى سين وجيم ... رحت نازل شارى جرنال الأخبار و قلبت فيه لحد ما لقيت صورة الريس

قصيتها وجيبتها معايا ورميت الجرنال أحسن بابا يقفشه معايا تبقى مصيبة

@@@@

@@@

@@

@

صورة الرئيس حسنى مبارك سنة2500م

صورة من المستقبل



هو صحيح كبر شوية بس صحته بمب وهيفضل موجود ويحكمكوا يا وحشين

باى باى

الأحد، 13 يوليو، 2008

قصة حياة أحمد عز (فيديو)

لكل من لا يعرف أحمد عز: هو الرجل الحديدى بمعنى الكلمة و متهيألى كدة انه بيفطر ويتغدى ويتعشى حديد
وهوأعلى مثل لزواج المال بالسلطة و كان الشهود الفساد والرشوة والمأذون كان كفيف وأطرش وأخرس
أسيبكو بقى تشوفوا الفيديو

video

الراجل دة هو أكبر أمثلة الفساد والاحتكار والتوحش الرأسمالى الذى وصلت اليه مصر بفضل الحكومة الرشيدة و رئيسها المبجل و حكومة البزنس وبيع البلد للى يسوى واللى مايسواش واللى معاه فلوس يشيل

خلاص مصر خلصت.... بححححح