الخميس، 20 مارس، 2008

الكثير والكثير من....


بسم الله الرحمن الرحيم

الكثير والكثير من السمات والصفات تمتع بها حكومتنا الغراء ما لا يمكن حصره فى رسالة واحدة , ومع ذلك سأحاول الاختصار.
أولا: التباته والغتاته والرزاله بجد يعنى..الناس كلها الشعب المصرى كله رافع شعار لا للتمديد لا للتوريث وحسنى وابنه قاعدين فى منتهى البرود فى تراس القصر الجمهورى ومشغلين الكاسيت وبيسمعوا أغنية ( اخترناه .. اخترناه ) طول النهار والليل ..مع ان الناس لا حول لها ولا قوة.. ولا اختاروه ولا اختاروا ابنه ولا اختاروا حكومة النظافة اللى على العكس تماما من كده ولا حتى اختاروا الحزب بتاعه ولا حاجه خالص. اللى يغيظك بقه أكتر من كده السادة الوزراء الأفاضل , عمر ما واحد فيهم حصل فى وزارته مصيبه وقدم استقالته لتقصيره فى أداء عمله. مع ان البلد كلها اتخصخصت وشبعت خصخصة الا همه , مازالوا عايشين فى عصر الوظيفة الميرى اللى لازم يمسكوا فيها حتى الموت
وبفرض ان الوزراء دول من الشعب , يبقى المفروض يبقى زيهم زى بقية الناس اللى أصبح الغالبيه العظمى منهم يعملون فى القطاع الخاص اللى مابيرحمش أى مقصر.. بس أكيد همه على راسهم ريشة.
ثانيا: الكذب. عصر مبارك هو الاطول وعلى مر سنوات حكمة العجاف سمعنا الكثير والكثير من الكذب ما يستحق وبكل جدارة ان يدخل موسوعة جينيز للأرقام القياسية والمصيبة انهم بيكدبوا الكدبة من دول ويصدقوها وأكبرها كدبة انتخابات الرئاسة والتعديلات الدستورية وقانون الارهاب وعدم المساس بالدعم وأولوية محدودى الدخل فى عيش حياة كريمة وغيرها كتيييييييييير أوى
ثالثا: السذاجة والهبل.. أيوة طبعا .. ماهو لما تيجى تقوللى المعلوماتية والقرية الذكية والمفاعل النووى , وانت عندك تلات تربع الشعب مش لاقى ياكل يبقى انت على طول يا عبيط يا أهبل
وكفاية كده بقه ولو عندكوا حاجة تانى ابقوا قولولى
سلام

الأحد، 16 مارس، 2008

النادى الأهلى المصرى...الحزب الوطنى الديموقراطى



بسم الله الرحمن الرحيم




النادى الأهلى العظيم..النادى الذى حير النقاد وألهب حماس الجماهير.. واستفحل وتوغل فى قلوب محبيه حتى أنه يكاد يصل عدد مشجعيه الى 90 بالمئة من اجمالى عدد مشجعى كرة القدم فى مصر..ناهيك عن انجازاته المحلية والقارية والعالمية..لن أطيل عليكم بالتقديم فهو غنى عن التعريف وسأدخل بالموضوع مباشرة.


بعد مباراة الأمس بين النادى الأهلى ونادى الزمالك والتى انتهت بفوز مستحق للأهلى بهدفين دون رد ,جلست أتأمل أحوال النادى العريق وأحسست أن الأهلى يشبه كثيرا الحزب الوطنى الديمقراطى مع وجود فروق , فقررت أن أرصد أوجه الشبه وأوجه الاختلاف بين الفريقين ..عفوا أقصد بين النادى والحزب..فوجدت أنها كالآتى:


أولا:أوجه التشابه:


1-الأهلى والحزب هما الأطول حكما كل فى مجاله


2-الاثنان يفوزان دائما


3-الاثنان يحصدان المال والشهرة


4-الاثنان يقمعان منافسيهما ويعلموهما الأدب


5-الاثنان يلعبان لعبتهما المفضلة


6-الفريقان تحكمهما أسرة واحدة


7-الفريقان حريصان على جلب السعادة دائما


ثانيا:أوجه الاختلاف:فهى شرح واف لما سبق :


1-الأهلى الأكثر فوزا بالدورى والكأس ومنها الكثير مرات متتالية وبذلك يكون الحاكم والمتوج على رأس كافة الفرق المصرية..أما التانى فهو حسنى الذى أصبح له 27 سنة فى الرئاسة..ومازال


2-الأهلى يفوز دائما بالجهد والجد وعرق اللاعبين وأدائهم المميز..والوطنى يفوز دائما بالتزويروغلق لجان الانتخاب أمام المعارضة والاخوان المسلمين وبعدالفبركة يشترى المستقلين ليضمن الأغلبية الساحقة وال..(( موااافقة ))


3-الأهلى يحقق المال والشهرة بكثرة الحصول على البطولات والتمثيل الدولى والقارى المشرف..الوطنى يحقق المال من بيع البلد قطعة قطعة ومن رفع الاسعارالى أعلى المعدلات فى ظل مناخ الاحتكار حتى أصبحت السلعة المحلية الانتاج تباع للمستهلك بنفس سعر المنتج المماثل فى دول الخليج مثلا مع عدم وجود أدنى وجه للمقارنة بين مصر ودول الخليج من حيث متوسط دخل الفرد.


4-الأهلى يؤدب منافسيه بالأداء القوى الرائع داخل البساط الأخضر..الوطنى يقمع الشعب والمنافسين من اخوان والمعارضة بالداخلية ومعتقلاتها وتعذيبها ومنع الاخوان من الترشيح ..وحملات الاعتقالات الموسعة ضدهم .. وغيرها من الامثلة الكثير.


5-لعبة الأهلى المفضلة هى كرة القدم..الوطنى لعبته الشعب الكادح المطحون المقهور.


6-الأهلى تحكمه أسرة واحدة هى أسرة مجلس الادارة الواعى الناجح المتماسك الحريص على مصلحة الفريق ونجاحه .. والوطنى يحكمه حسنى مبارك الاب وجمال مبارك العريس بسياساته وبزنسه الجامد وماما سوزان بمشاريعها الجامدة جدا والمودرن خالص


7-الأهلى حريص على جلب السعادة لجمهوره العريض..الوطنى حريص على جلب السعادة لنفسه فقط وجلب التعاسة والفقر والشقاء لزمرة الفقراء بل ويعمل على استيراد المزيد منها للشعب عن طريق خصخصة كل ما هو قابل أوغير قابل للخصخصة حتى الزبالة خصخصوها.


و أخيرا وليس آخرا, لكم منى التحية ,وسلام من الله عليكم ورحمته وبركاته.


الجمعة، 14 مارس، 2008

نحب نتعرف .. ورانا ايه ..ورانا ايه


بسم الله الرحمن الرحيم

أولا وقبل أى شى لازم تعرفوا أنا مين.. أنا واحد زى كل المصريين .. الشقيانين التعبانين .. أنا شاب زى كل شباب مصر الزهقانين من العيشة واللى عايشينها.. بس مش مهم و على رأى المثل ( ما ضاقت الا اما فرجت ) .وآدينا مستنيين الفرج .

على فكرة أنا مش صنايعى مش لاقى شغل ولا معايا ليسانس وبشتغل فى مطعم أو على ميكروباص ..مع العلم بقناعتى التامة ان الشغل مش عيب.. أنا للأسف كنت متفوق شويه وجبت مجموع ودخلت كلية الصيدلة واتخرجت والحمد لله واشتغلت كمان فى نفس مجال تخصصى و دى حد ذاتها ميزة كبيره ما انكرهاش..ولكن بعد ما بدأت الحياة العملية اصطدمت بواقع أليم ومرير .. اكتشفت أن مجتمعنا بالكامل بعد أن تحول بقدرة قادر وعلى ايدين حسنى مبارك وزبانيته الى مجتمع متخصخص وليس متخصص , بمعنى آخر أنه فى ظل الرأسمالية المتوحشة التى نعيشها حاليا أصبح لكل من يملك المال أن يخصخصله حته كده ياكل منها عيش ومش مهم بقه الباقى ياكلوا طوب ..ده اللى حصل فى مصر فى كل المجالات بلا استثناء و منها مجال الصيدلة و شيعت مقولة ادى العيش لخبازه الى مثواها الأخير..فأصبح كل من هب ودب من الناس المريشين الوارثين يفتح صيدلية واتنين و ممكن كمان يقف يشتغل فيها وهو لا يفقه شيئا عن الصيدلة وكبيره فى التعليم الدبلوم والناس تقوله يا دكتور .. يا جماعة الكلام دة حقيقة مش أى كلام بيتقال وخلاص, لأنى تعرضت لهذا الموقف اما رحت مره أشتغل فى صيدلية وبعد ما استلمت الشغل لاحظت ان صاحب الصيدلية يتجنب الحديث معايا عن اى حاجه علمية متعلقة بدواء معين , ما اضطررنى أن أسال عنه لحد ماعرفت ان مؤهله (خدمة اجتماعية )..


ازى الحال يا اخواننا..يا أهل الله ياللى هنا .. ايه رأيكم ..والغلط عند مين ؟؟؟